Sapo ka përfunduar takimi në Uashington mes kryeministrit Edi Rama dhe sekretarit amerikan të Shtetit, Anthony Blinken. Rama ka dhënë një një intervistë për Zërin e Amerikës duke dhënë edhe detaje në lidhje me atë çfarë është biseduar me Blinken.
“Diskutuam lidhur me bashkëpunimin në Këshillin e Sigurimit, lidhur me marrëdhëniet bileterale, padiskutim lidhur me rajonin, me ecurinë e reformave në Shqipëri dhe në tërësi prekën të gjitha temat që janë të rëndësishme, përfshirë edhe temën të qenit bashkë në Aleancën në NATO”, tha Rama.
Ndërsa bëri të ditur dhe vendimin e përbashkët mes Shqipërisë dhe SHBA-së për përfaqësimin në KS e OKB-së.
“Është një proces i njohur në traditën e Këshillit të Sigurimit ku dy vende ose më shumë bëhen bashkë për të adresuar një ose disa vendeve të caktuara dhe SHBA na e propozuan ne, dhe ne e pranuam dhe kjo na jep kënaqësi dhe përgjegjësi”, theksoi Rama.
Por a do të ketë një iniciativë nga Shqipëria për paraqitjen e një rezolute në KS për krizën në Ukrainë? Kryeministri theksoi se “kjo nuk është një çështje e Shqipërisë tanimë, por e gjithë botës, e Kombeve të Bashkuara e KS e patjetër në këtë proces ne do të jemi krah për krah SHBA. E vendimmarrja, sigurisht të jemi realist ajo i takon SHBA”.
