Ambasadori i Ukrainës në Organizatën e Kombeve të Bashkuara (OKB), Sergiy Kyslytsya, ka lexuar në Asamblenë që po zhvillohet në këto momente para zyrtarëve nga e gjithë bota mesazhet e fundit të një ushtari rus në Ukrainë me nënën e tij.
“Nënë, kam frikë, po godasim edhe civilët”, shprehet ushtari rus, ndërkohë që nëna e shqetësuar e pyet se çfarë po ndodh, pasi mendonte se i biri ishte ende në Krime duke bërë stërvitje.
“Për herë të parë që nga krijimi i OKB-së, çdokush në botë e di se Rusia filloi këtë sulm e mbështetur nga Bjellorusia. Kjo luftë nuk u provokua, u urdhërua nga dikush që po qëndron i ulur në bunker. Ne e dimë çfarë ndodhi në Berlin në Maj të 1945. Përpara se të vijoj deklaratën time, do të doja të flisja rusisht dhe t’ju lexoja mesazhin e marrë me “screenshot” nga telefoni i një ushtari rus përpara se të vritej”, tha ambasadori ukrainas Kyslytsya.
Mesazhet e ushtarit rus me nënën e tij:
Nëna: Si je, pse po vonon kaq shumë për t’u përgjigjur. A je akoma në stërvitje?
Ushtari: Mami, nuk jam më në Krime, nuk jemi në stërvitje
Nëna: Atëherë ku jeni? Babi po pyet nëse mund të të dërgojmë një pako
Ushtari: Çfarë pako po thua?
Nëna: Çfarë po thua? Çfarë nuk po shkon si duhet?
Ushtari: Mami, unë jam në Ukrainë. Këtu ka luftë të vërtetë. Kam frikë, po i godasim të gjithë, madje edhe civilët. Na kishin thënë se njerëzit do të na mirëprisnin këtu, por ata po hidhen poshtë makinave tona, duke mos na lënë të kalojmë. Na quajnë fashistë. Mami, është shumë e vështirë.
