Forcat ukrainase kanë vrarë gjatë luftimeve një gjeneral rus pranë qytetit të rrethuar të Kharkiv. Bëhet me dije se ky është komandanti i dytë i lartë rus që vdiq në pushtimin e vendit nga Vladimir Putin.
Sipas mediave të huaja gjeneralmajor Vitaly Gerasimov, 45 vjeç, u vra të hënën, tha në një deklaratë Shefi i Drejtorisë së Inteligjencës të Ministrisë së Mbrojtjes të Ukrainës. Gerasimov ishte zëvendëskomandanti i parë i ushtrisë së 41-të të Rusisë dhe vdekja e tij përfaqëson një tjetër goditje të madhe për forcat e Putinit.
Gjenerali mori pjesë në luftën e dytë çeçene, në operacionin ushtarak rus në Siri dhe në aneksimin e Krimesë, duke fituar medalje nga ato fushata.
Christo Grozev, drejtor ekzekutiv i grupit të gazetarisë investigative Bellingcat, tha në Twitter se lajmi për vdekjen e Gerasimov u përgjua nga zyrtarët ukrainas ndërsa iu transmetua zyrtarëve të ushtrisë ruse.
Duke ndarë një fotografi të bisedës në rusisht, Grozev shkroi se ushtria e 41-të në rajon ka humbur komunikimin, dhe kështu duhet të përdorin një kartë SIM lokale e cila i lejoi Ukrainës të përgjonte thirrjen.
