Çmimet në vend kanë pësuar një “boom” rritjesh në ditët e fundit, ndërsa më shumë u vu re shtrenjtimi i vajit, i cili pësoi rritje të menjëhershme.
Autoriteti i Konkurrencës u vu në lëvizje duke hapur një hetim për tregun, ndërsa ka njoftuar se gjatë kontrolleve në treg ka gjetur shkelje në disa kompani të importit të vajit vegjetal.
Gjatë hetimit të thelluar të kryer gjatë këtyre ditëve pas shtrenjtimit të menjëhershëm të çmimit në tregje, Autoriteti bën me dije se është konstatuar një sjellje e bashkërenduar për të rritur çmimin e vajit vegjetal nga disa kompani, të cilat gjenerojnë produktin në tregun tonë.
Konkurrenca ka konstatuar se kompanitë në fjalë kanë rritur çmimin e vajit duke u marrë vesh me njëra-tjetrën, gjë që ka ndikuar negativisht në xhepat e qytetarëve.
“Nga informacioni i administruar nga Drejtoria e Përgjithshme e Doganave, për periudhën 1 janar 2022 – 11 mars 2022, ndër të tjera u konstatua se çmimi mesatar mujor i importit në muajin janar 2022 ka qenë në vlerën 199.23 lekë/litri dhe në mars 2022 është rritur në vlerën 208.54 lekë/litri. Çmimi i vajit vegjetal rezulton se është rritur gati me 7.5% nga muaji shkurt 2022. Për sa më sipër, rezulton se rritja në të njëjtën kohë për periudhën janar – mars 2022 e çmimit të shitjes së vajit vegjetal nga ndërmarrjet në fjalë”, njofton Autoriteti i Konkurrencës.
