Sulmuesi i Boca Juniors, Edoardo Salvio, është bërë së fundmi protagonist i një ngjarje të shëmtuar. Mediat argjentinase raportojnë se ai ka shtypur me makinë gruan e tij, Magali Aravena, pasi kjo e fundit e kishte kapur mat me një tjetër.
Çifti kishte vetëm pak ditë që ishte ndarë dhe ndoshta aksidenti i ndodhur të mërkurën në mbrëmje në Buenos Aires mund të ketë pasur lidhje me problemet e çiftit.
Këtë ka lënë të kuptohet edhe bashkëshortja e Salvios, e cila ka denoncuar ish-bashkëshortin e saj në polici. Në denoncimin e saj ajo ka saktësuar se Edoardo Salvio e ka përplasur me dashje. Si për të vërtetuar gjithçka ndodhi orët e vona të mbrëmjes në kryeqytetin e Argjentinës, në rrjet kanë qarkulluar video të shumta që tregojnë momentin e aksidentit. Salvio jo vetëm që e ka përplasur me makinë bashkëshorten e vet, por është larguar menjëherë nga vendi i ngjarjes, duke e lënë atë në mes të rrugës. Sulmuesi tani rrezikon shumë.
