Suedi- Një valë e dhunshme protestash kanë shpërthyer në Suedi pas djegies së Kuranit. Gjithçka nisi kur politikani danez i ekstremit të djathtë, Rasmus Paludan, i vuri flakën Kuranit, dhe aktin paralajmëroi ta kryente dhe në qytete të tjera.
Të dielën, një turmë prej rreth 150 personash hodhën gurë ndaj oficerëve të policisë dhe u vunë flakën makinave në qytetin lindor të Norrkoping.
Paludan dhe partia e tij Stram Kurs kishin organizuar një demonstratë në zonë, por nuk u shfaqën kurrë, raportuan mediat suedeze.
Policia iu kundërpërgjigj protestës me të shtëna në ajër, por tre persona u plagosën si pasojë e plumbave rikoshet, dhe më pas u dërguan drejt spitalit. Ata më vonë u “arrestuan nën dyshimin për krim”, tha policia.
Trazira u raportua gjithashtu në qytetin e afërt të Linkoping, ku zoti Paludan kishte planifikuar të zhvillonte një demonstratë, por më vonë ai e anuloi.
Gjatë tre ditëve të fundit, përleshje të dhunshme janë parë në kryeqytetin e Suedisë, Stokholm, si dhe në një numër qytetesh të tjera.
Dhjetra punonjës policie mbetën të plagosur gjatë trazirave, ndërkohë që flakëve nuk iu shpëtoi as një mjet i urgjencës.
Në rajonin jugor suedez të Landskrona, disa protestues u vunë flakën makinave, gomave dhe koshave, ndërsa të tjerë ngritën një pengesë për të penguar trafikun.
Demonstrata të ngjashme u zhvilluan në qytetin e tretë më të madh të vendit, Malmo, ku u dogj një autobus i qytetit dhe objekte të tjera.
Paludan krijoi partinë Stram Kurs në vitin 2017 dhe tani është e njohur për axhendën e saj kundër imigracionit dhe anti-islamit. Noa.al
