Futbolli mund të jetë në një periudhë pushimi, por zërat e merkatos të skuadrave më elitare në kontinent shtohen gjithnjë e më shumë.
Për më tepër, ndjekim disa nga titujt kryesorë të mediave sportive që mbulojnë lajmet më të fundit.
Spanjollja “Sport” hapet me titullin: “Barça-Dembele, marrëveshja në horizont”. Francezi duket se është gjithnjë e më pranë rinovimit të kontratës me skuadrën katalanase.
E përditshmja “AS” shkruan: “Rinovimi, prioritet”, duke iu referuar kështu bomberit francez të Real Madrid Karim Benzema, i cili hyn në vitin e tij të fundit të kontratës me galaktikët. Madrilenët duan të blindojnë sulmuesin i cili zhvilloi sezonin e tij më të mirë të karrierës duke qenë favorit për të fituar Topin e Artë për këtë vit futbollistik.
“Christensen-Kessie, të konfirmuar”, shkruan gazeta katalanase “Mundo Deportivo”. Barcelona synon të mbyllë nënshkrimet e para të kësaj merkatoje verore, duke afruar kështu mbrojtësin e Chelsea-t Christensen dhe mesfushorin e Milanit, Kessie.
Prestigjozja “Marca” ka zhvendosur fokusin në botën e Formula 1 duke u hapur me titullin: “Carlos, i pari”. Carlos Sainz ka arritur një pole position fantastik në pistën e Silverstone në Britani, duke lënë kështu pas Verstappen dhe Leclerc. Piloti i Ferrarit synon të fitojë garën që do të mbahet ditën e sotme duke e nisur nga vendi i parë.
Në Itali, “La Gazzetta Sportiva” shkruan: “Lukaku shënon menjëherë”. Sulmuesi belg pas rikthimit te Interi, kërkon impaktin e menjëhershëm duke u bërë golashënuesi më i mirë i sezonit të ardhshëm.
“Edhe Napoli thërret Dybala-n” shkruan “Corriere dello Sport”. Dybala është zyrtarisht pa ekip dhe të gjithë skuadrat e Serie A synojnë firmën me argjentinasin. Disa prej skuadrave të interesuara janë Inter, Milan dhe Roma, por mesa duket listës i është shtuar edhe ekipi napoletan i udhëhequr nga Spalletti.
E përditshmja italiane “Tuttosport” hapet me titullin: “Vlahovic, më i mirë se Haaland”. Është kjo deklarata e presidentit të federates serbe të futbollit, Nenad Bjekovic.
