Ndikimin më të madh, veçse nga ana humanitare me humbjen e qindra jetëve në Ukrainë, lufta e ka patur në tregjet globale të naftës.
Çmimi i ka pësuar uljen në nivelin më të ulët që pas nisjes së luftës mes Ukrainës dhe Rusisë.
Çmimi i naftës ka pësuar rënie të ndjeshme gjatë ditës së sotme në bursë, ku një fuçi bruto tregtohet me rreth 5% më pak, apo 4 dollarë më lirë.
Aktualisht një fuçi naftë brent tregtohet me 93.10 dollarë, dhe ajo e papërpunuar me 87.13 dollarë.
Sipas ekspertëve, ulja e ndjeshme vjen pas publikimti të të dhënave të dobëta ekonomike të Kinës, që është importuesi më i madh në botë i naftës së papërpunuar, ndërsa eksportuesi më i madh i naftës në botë, Saudi Aramco njoftoi se është gati të rrisë prodhimin.
Ekonomia e Kinës u ngadalësua papritur në korrik, ndërsa prodhimi i rafinerisë ra në 12.53 milionë fuçi në ditë, më i ulëti që nga marsi 2020, treguan të dhënat e qeverisë kineze.
Rënia e madhe e çmimit të naftës të këtë të hënë përputhet saktësisht me nivelin më të ulët të mëparshëm pas pushtimit, i cili u arrit më 5 gusht. Çmimi i Brent arriti kulmin më 7 mars në 139,13 dollarë, kur nisën shqetësimet për furnizimet nga Rusia.
Çmimi qëndroi mbi 100 dollarë për shumicën e kohës që atëherë, një nivel i parë rrallë në histori.
Në Shqipëri, çmimi i naftës mbetet i pandryshuar prej katër ditës, pasi është fiksuar për herë të fundit nga Bordi i Transparencës në vlerën e 221 lekë/litër me pakicë, një rritje me 5 lekë nga çmimi i mëparshëm.
