Kryeministrja finlandeze Sanna Marin ka rezultuar negative për drogë të paligjshme, sipas një deklarate të lëshuar nga qeveria finlandeze. Euronews shkruan se Marin, tha se ajo bëri një test droge të premten e kaluar për mbrojtjen e saj ligjore, pas presionit nga lideri i një kundërshtari politik të krahut të djathtë, pasi u shfaqën dy video të festës së saj me miqtë në fillim të gushtit.
Kundërshtarët politikë dhe disa media finlandeze, kishin menduar se një nga videot përmbante një referencë për kokainën, megjithëse doli se nuk ishte kështu. Kampioni i urinës së Marin u testua për praninë e drogave të ndryshme, si kokaina, amfetamina, kanabisi dhe opioidet, tha një këshilltare e kryeministres, Iida Vallin.
“Testi i drogës i marrë nga kryeministrja Sanna Marin më 19 gusht 2022 nuk zbuloi praninë e drogës. Testi ishte një test gjithëpërfshirës i drogës. Nuk kemi zgjedhur se si është bërë testi”, tha Vallin.
Një video e publikuar javën e kaluar tregoi Marin duke kërcyer dhe festuar me një grup miqsh dhe të famshëm që krijoi polemika në të gjithë botën. Ajo pranoi se kishte pirë alkool. Përveç mohimit të marrjes së drogës, ajo tha se nuk ishte dëshmitare e përdorimi të drogës nga asnjë prej të pranishmëve.
