Suksesi i Luiza Gegës padyshim që ka lumturuar të gjithë tifozët shqiptarë anembanë. Mirëpo, një tjetër shqiptare ka shkëlqyer në Europianin e Atletikës, ndonëse me flamurin grek. Ajo është Elina Xhengo, që fitoi medalje të artë në hedhje shtize dhe u shpall kampione e Europës.
Ajo u kthye në Greqi, ku qindra njerëz e pritën 19-vjeçaren, ku familjar, të afërm, miq edhe shumë të tjerë pushtuan aeroportin “Macedonia”.
Xhengo nuk mundi t’i përmbante dot lotët, teksa u prit si heroinë në Greqi pas atij triumfi të paharrueshëm.
Ajo ka lindur në Greqi më 2 shtator 2002 dhe prindërit e saj janë emigrantë shqiptarë. Xhengo, në fakt prej shumë vitesh ka tentuar të garojë me Greqinë por nuk lejohej pasi nuk kishte ende dokumentet e nënshtetësisë greke. Sportistja ia doli dy vite më parë dhe që atëherë nuk ndalet më, duke siguruar sukses pas suksesi, pavarësisht moshës së re, siç ishte medalja e artë në Europianin e Atletikës.
