Të hënën e 29 gushtit, një ekip inspektimi nga Agjencia Ndërkombëtare e Energjisë Atomike (IAEA), u nis për vizitë në termocentralin bërthamor të Zaporizhzhia, Ukrainë.
Teksa lufta ndodhet sot në ditën e 190 të saj, inspektorët kanë arritur në Kiev.
Ata do të monitorojnë situatën delikate në termocentralin më i madh bërthamor. Në mesin e inspektorëve ka edhe shqiptarë.
Rafael Grossi, drejtor i përgjithshëm i Agjencisë Ndërkombëtare të Energjisë Atomike, deklaroi se misioni i IAEA dëshiron të “shmangë një aksident bërthamor” në uzinën e Zaporizhzhia.
Ndërkohë, Ukraina vazhdon t’i kërkojë Rusisë që të ndalojë bombardimin e zonës përreth uzinës, e cila është e pushtuar nga forcat ruse. “Trupat pushtuese ruse duhet të ndalojnë së shtëna në korridoret e përdorura nga delegacioni i IAEA dhe të mos pengojnë aktivitetet e tij në termocentral”, deklaroi zëdhënësi i diplomacisë ukrainase Oleg Nikolenko.
Zyrtarët e instaluar nga Rusia në zonën pranë termocentralit, sugjeruan se vizita mund të zgjasë vetëm një ditë, ndërsa Agjencia Ndërkombëtare e Energjisë Atomike dhe zyrtarët ukrainas pretendojnë se ajo do të zgjasë më gjatë. Rusia pushtoi centralin, më të madhin të Evropës në fillim të marsit si pjesë e asaj që Moska e quan “operacioni i saj special ushtarak” i nisur më 24 shkurt.
