Christopher Nkunku po vazhdon formën fantastike edhe këtë sezon me skuadrën gjermane RB Leipzig.
Sulmuesi francez e ka nisur për mrekulli sezonin e ri, ku në tetë ndeshjet e para zyrtare ka shënuar gjashtë gola dhe ka dhuruar një asistim.
24-vjeçari rinovoi muaj më parë kontratën me Leipzig deri në verën e vitit 2026, por nuk pritet të qëndrojë edhe shumë gjatë tek kjo skuadër, pasi klubet më të mëdha evropiane janë vënë pas tij.
Marca ka raportuar se Real Madrid është duke e monitoruar situatën e Nkunkus dhe formën që po kalon francezi me RB Leipzig.
‘Los Blancos’ synojnë transferimin e yllit francez për sezonin e ri, derisa Nkunku ka një klauzolë largimi nga Leipzig.
Kampioni në fuqi i Europës nuk e ka problem që të paguaj klauzolën e francezit prej 60 milionë euro.
Gjithsesi madrilenët nuk do ta kenë aspak të lehtë të nënshkruajnë me Nkunkun pasi në garë për të janë edhe skuadra tjera të mëdha si PSG, Bayern Munich, Liverpool, Chelsea, Arsenal e Inter.
