Momente nervozizmi në “Olimpico”, gjatë ndeshjes, shumë afër fundit, mes Lazios dhe Veronës. Në minutën e 73-të, Maurizio Sarri humbi durimin dhe bëri një gjest jo elegant drejt stolit të Veronës.
Trajneri bardhekaltër tregoi gishtin e mesit drejt drejtorit sportiv kundërshtar, Francesco Marroccu, para se të “markohej” nga një anëtar i stafit të Lazios dhe gjyqtari i katërt Baroni. Një sherr me stafin kundërshtar pas një konflikti mes Luis Albertos dhe Ilic kishte ndezur inatin e trajnerit të bardhekaltërve.
Sarri, pavarësisht gjestit, nuk u sanksionua me kartona. Dhe pas ndeshjes, në një konferencë për shtyp, ai donte të zvogëlonte episodin: “Gjithçka u qartësua. Ne njihemi prej shumë vitesh me Marroccu, m’u duk se më tha ‘ulu’ dhe u zemërova.
Në realitet më kishte thënë ‘qëndro i qetë’. Kur u sqaruam, qeshëm për këtë”.
Për Dazn, trajneri lacial ka komentuar më pas ndeshjen. “Jam i kënaqur sepse ishte një ndeshje e vështirë kundër një skuadre të vështirë për t’u përballur.
Na u desh durim me llojin e lojës së tyre. Pastaj, këto lloj ndeshjesh në një terren jo të denjë për qytetin e Romës bëhen edhe më e vështira. Kërkon gjithmonë një përpjekje shtesë se normalja”.
Sarri është i kënaqur me atë që ka bërë Lazio e tij deri më tani këtë sezon: “Ne kemi një mesatare prej dy pikësh për ndeshje, kampionati ynë është i kushtëzuar nga të luajturit në Europa League, por kjo vlen për të gjithë. Nuk kemi pësuar gol, ky është aspekti më i rëndësishëm”
