Në fjalën e tij në Asamblenë e OKB-së, kryeministri Edi Rama solli në vëmendje sulmin kibernetik nga Irani duke thënë se duhen dënuar shtete të tilla që cenojnë demokracinë e një vendi.
Ai bëri thirrje që tani e gjithë bota të kthejë vëmendjen edhe nga sulmet virtuale, si ai me të cilin u përball Shqipëria në korrik dhe sërish tani në shtator.
“Shqipëria pësoi një sulm me qëllim vjedhjen e të dhënave dhe paralizim të sistemeve në korrik dhe më pas shkatërrimin e tyre. Një hetim i kryer me ekspertizën më të mirë ka konfirmuar se sulmi ishte një agresion i orkestruar nga Irani. Qeveria shqiptare nuk pati zgjedhje por ndërpreu marrëdhëniet diplomatike me Iranin. Ne i bëjmë thirrje OKB-së të përqendrohet më seriozisht për sigurinë kibernetike për të ndihmuar në parandalim,”-tha Rama ndër të tjera.
Ndërkohë që gjatë gjithë kohës që Rama fliste, kamera u kthye edhe nga përfaqësuesi i Iranit në sallë, i cili për asnjë moment nuk e ngriti kokën, por mbajti shënim gjithë ç’tha kryeministri i Shqipërisë në fletën që kishte para.
