Kreu i Partisë Demokratike Sali Berisha dhe kreu i PL Ilir Meta kanë reaguar ndaj lirimit nga paraburgimi i ish-deputetit të PS-së Alqi Bllako, i akuzuar për aferën e inceneratorëve.
Një ditë pas ish-deputeti i PS-së Alqi Bllako u lirua nga burgu, duke ia ndryshuar masën e sigurisë nga “burg pa afat” në “arrest shtëpie”, mbajtën qëndrim edhe dy liderët e opozitës. Berisha u shpreh se Bllako kërcënoi Veliajn dhe Ramën. “Dje(të enjten), e liruan deputetin pasi ua kërcëlliti dhëmbët Erion Veliajt dhe Edi Ramës. Bllako, që me paratë tuaja, i kishte lidhur një rrogë 10-12 milionë lekë të atit. A do e tolerojmë ne këtë? A mund ta pranojmë ne këtë rritje të çmimit të naftës? Jo, sepse është e tëra vjedhje. Pse Kosova dhe Mali i Zi ta kenë 900 lekë më lirë? Kjo sepse Rama ka gjetur Rama ka gjetur naftën, energjinë, si një shpatë mbi kokën e shqiptarëve. Ne do ngrihemi dhe do ngrihemi në protesta të fuqishme”, u shpreh Berisha nga Memaliaj.
Reagimi i Metës
Kreu i Partisë së Lirisë, Ilir Meta, ka reaguar këtë të premte për ndryshimin e masës së sigurisë ndaj ish-deputetit Alqi Bllako, nga arrest me burg në arrest shtëpie, për aferën e inceneratorëve. Meta u shpreh se ky vendim është një goditje fatale për sistemin e drejtësisë. Ai theksoi se e gjitha është bërë me urdhër të Edi Ramës, pasi sipas Metës, është kryeministri koka e kësaj afere. “Sa familjarë janë burgosur për një dritare? Ata nuk kanë fëmijë për të rritur, ndoshta nuk kanë as mundësi të paguajnë një dado. Vendimi i djeshëm tregoi që koka e kësaj afere është Edi Rama, nuk janë as Alqi, as Lefteri. Kjo është drejtësi më regji. Sepse drejtësia nuk veproi kurrë atëherë kur duhet të vepronte. Fakte flagrante, jo fjalë. Shkelje të hapura nga Edi Rama, Engjell Agaçi dhe ministra. Lirimi i djeshëm i Alqi Bllakos është një goditje fatale për sistemin e drejtësisë. Është një humbje morale, e gjitha me urdhër të Edi Ramës”, tha Meta.
