I cilësuar si Homeri i letrave Shqipe, Gjergj Fishta do të kujtohet gjithmonë për vlerën e madhe të veprave të tij letrare e konkretisht për kryeveprën “Lahuta e Malcis”.
Fishta është një nga vazhduesit autentikë dhe të drejtpërdrejtë të Rilindjes Kombëtare, shprehës i idealeve atdhetare dhe demokratike në kushtet e krijuara në shekullin e njëzet dhe kjo shprehet në mënyrë të dukshme edhe në mënyrat e pasqyrimit të jetës në krijimtarinë e tij, si vazhdim i natyrshëm i teknikës letrare të Rilindjes, ku mbizotëron romantizmi, realizmi dhe klasicizmi.
Gjergj Fishta ishte i pari shkrimtar shqiptar, i propozuar për çmim ‘Nobel’, prozator, poet, përkthyes; “Militant i letërsisë shqipe” – cilësuar nga Lasgush Poradeci dhe “Poet kombëtar i shqiptarëve” nga Eqrem Çabej.
Drejtoria e Përgjithshme e Arkivave ka publikuar sot në kujtim të poetit të madh disa fotografi dhe të dhëna nga jeta e tij.
AQSH ka publikuar dokumentin i cili tregon se Fishta ishte caktuar delegat në Konferencën e Paqes në Paris në 1919.
