Jemi futur në fundjavën futbollistike dhe disa ndeshje të bukura do të na shoqërojnë në këto dy ditë.
Ndjekim disa nga titujt kryesorë për ditën e sotme:
La Gazzetta dello Sport ia kushton faqen e parë Interit të presidentit Zhang: “Interi sheh yjet”. Dje, gjatë mbledhjes së aksionerëve, presidenti i zikaltërve u rikthye: “Çdo vit kemi forcuar skuadrën, tifozët dhe veten, ne presim që të jemi gjithmonë konkurrues, të krijojmë një rrugë pozitive brenda dhe jashtë fushës. Sa për Skriniar, jam i sigurt se ai e di rëndësinë e këtij klubi. Ai i do ngjyrat tona, kështu që jam i sigurt se do të gjejmë një marrëveshje për të dyja palët”.
“Ecim me Diegon”, ky është titulli i Corriere dello Sport. Napoli kundër Sassuolos është në kërkim të fitores së tyre të trembëdhjetë radhazi, duke t’ia dedikuar fitoren Maradonës, idhulli i Napoletanëve që nesër do të kishte mbushur 62 vjeç.
Së fundmi, Tuttosport ia kushton faqen e parë sot urgjencës së lëndimit në Juve: “Jo vetëm fat i keq”. Alarmi është edhe për Dushan Vlahovic, i cili vuan sërish nga dhimbjet e ijeve.
“E ndaluar të dështojë” eshtë titulli i gazetës katalanase Mundo Deportivo, që ia kushton faqen e parë Barcelonës së Xavit, i cili nuk mund të gabojë më pas eliminimit nga Champions League.
Në Angli, nga ana tjetër, Mirror Sport hapet me titullin “Fqinj nga ferri”, duke u fokusuar tek deklarata e Guardiolës për Djajtë e Kuq: “Kam ndjenjën se United po kthehet, më në fund United po kthehet. E kam parë kundër Chelsea, në pjesën e parë. Unë thashë se më pëlqen ajo që shoh nga United tani”.
