Nga “La Gazzetta dello Sport”, te “Corriere dello Sport” dhe spanjollja “Mundo Deportivo”: ja titujt kryesorë në faqet e para të gazetave sportive kryesore në botë për ditën e sotme.
‘La Gazzetta dello Sport’ hapet me një nga temat më të rëndësishme të tregut të momentit: “Leao, firma e nxehtë”. Mes Milanit dhe portugezit nuk ka asnjë marrëveshje për shifrat për rinovimin, të paktën për momentin.
Ndërkohë sot pritet ndeshja e rëndësishme për kreun, me Atalantën që do të sfidojë liderët e Napolit, që vijnë me një mungesë të rëndësishme. “Kaq shumë Osi” shkruan “Corriere dello Sport” duke iu referuar bomberit nigerian Osimhen i cili do të udhëheqë i vetëm sulmin e Napolit, me talentin gjeorgjan Kvaratskhelia, jashtë fushës si pasojë e një problemi fizik.
“Tuttosport” hapet me titullin “Juve, goditja ndaj Interit”. Derbi i Italisë do të luhet mbrëmjen e nesërme me bardhezinjtë të cilët synojnë fitoren e parë kundër zikaltërve pas 2 vitesh.
Në Spanjë, prestigjozja “Mundo Deportivo” i kushton një vëmendje të veçantë mbrojtësit katalanas Gerard Pique, i cili do të luajë sot ndeshjen e tij të fundit me fanellën e Barcelonës pasi vendosi të tërhiqej nga futbolli. “Puthja e fundit” është titulli kryesor i gazetës spanjolle.
E përditshmja britanike “Daily Express Sport” ndez sfidën mes Tottenham dhe Liverpool me deklaratën e Conte-s kundrejt Jurgen Klopp: “Ne të kushtuam ty titullin”, me italianin i cili i është përgjigjur teknikut të “The Reds” pasi ky i fundit u shpreh negativisht për fubollin e luajtur nga londinezët e “Spurs”.
