Intervistë e gjatë dhe interesante për ‘AS’ nga Antonio Rudiger, mbrojtësi i Real Madrid, me një të kaluar edhe në Itali. Jo vetëm fusha dhe futbolli i luajtur, por edhe disa mendime shumë të thella në lidhje me fëmijërinë dhe rritjen e tij.
Fillohet nga futbolli dhe nga transferimi te Real Madrid dhe fillimi i aventurës së re: “Para se të vija këtu më kanë kërkuar shumë skuadra, por kam marrë në konsideratë vetëm dy opsione: të qëndroja te Chelsea ose të shkoja te Real Madrid.
“Kam kaluar pesë vite në Londër dhe kam pasur një status të veçantë, mund të kisha qëndruar aty ose të transferohesha te Real Madrid. Edhe Barcelona u interesua për mua, po, por e kisha të pamundur dhe nuk ka qenë kurrë një opsion”, ka thënë Rudiger.
“Kam thënë më parë se Real Madrid ishte një ëndërr për mua, kjo skuadër më dukej e paarritshme. Mjafton të shikosh lojtarët që kanë mbrojtur ngjyrat e Madridit: Zidane, Ronaldo, Cristiano Ronaldo.
“Të kesh mundësinë të luash me Modric, Kroos dhe Benzema, nuk mund ta refuzoja. Kur e kam mësuar se Real-i më kërkonte? Ma ka thënë vëllai im. Nuk më besohej. Rrëqethem akoma nëse e mendoj”.
Mbrojtësi ka folur edhe për jetën e tij private dhe vullnetin për të mos u dorëzuar kurrë: “Kam lindur në një lagje pak të ashpër. Ishim gjashtë vëllezër dhe nuk kishte shumë para”, ka kujtuar Rudiger.
“Lufta dhe sherret rrugës ishin diçka normale për mua. Nga ku vij unë mbijetojnë më të fortët. Por në përgjithësi kjo dëshirë për të mos u dorëzuar kurrë është në ADN-në time. Mamaja ime, në fakt, më quan ushtar”
