Presidenti i Federatës Shqiptare të Futbollit, Armand Duka ka folur për mediat italiane, para ndeshjes miqësore, Shqipëri-Itali që do të luhet në mbrëmje.
Për “tuttomercatoweb”, Duka deklaroi se Kumbulla dhe Asllani duhet të ndryshojnë ekip, në mënyrë që të kenë më shumë minuta në dispozicion.
I pyetur për Brojën, Duka tha se duhet të luajë që të jetë në formë dhe do i pëlqente një transferim te Milani, skuadër për të cilën ai bën tifo.
“E vërtetë që Kumbulla dhe Asllani po luajnë pak në klubet e tyre. Nuk e di nëse është rruga e duhur për ta, duke pranuar pankinën. Sipas meje është më mirë që të shkojnë në klube ku mund të luajnë titullarë. Të gjithë kanë nevojë të luajnë, por sidomos këta djem të rinj.
Broja po gjen pak hapësira. Ishte më mirë te Southempton ku luante gjithmonë titullar. Tani luan 15-20 minuta dhe nuk është njësoj si të luash 90 minuta.
Mua më intereson që ai të luajë dhe të jetë në formë, nuk ka rëndësi se me kë klub. Sigurisht, nëse transferohet te Milani akoma më mirë, sepse unë jam pak tifoz me kuqezinjtë”, u shpreh Duka per median italiane.
