Portugalia është një nga kombëtaret pretendente për triumfin final në Botërorin e Katarit. Kombëtarja luzitane nuk ka fituar kurrë më parë një Kupë Bote, pavarësisht se ndër vite ka pasur breza të shkëlqyer lojtarësh.
Trajneri i Portugalisë, Fernando Santos ka komentuar momentin e vështirë që po kalon Cristiano Ronaldo. Kapiteni ka prishur çdo raport me Manchester United, por një gjë e tillë nuk e shqetëson 68-vjeçarin nga Lisbona.
“Nuk më intereson situata që po krijohet mes Manchester United dhe Cristianos, ai është gjithmonë i uritur. Cris dëshiron të na dërgojë në majën e botës”, theksoi Santos, i cili ka besim maksimal te pesë herë fituesi i Topit të Artë, pavarësisht se gjatë kësaj periudhe ka luajtur fare pak.
37-vjeçari do të luajë Botërorin e pestë në karrierë në Katar, aty ku Portugalia është pjesë e grupit H, aty ku do të tentojë të lërë pas Uruguain, Ganën dhe Korenë e Jugut.
