Kryetari i Partisë së Lirisë, Ilir Meta, paraditën e sotme ka shkuar në ambientet e selisë blu ku dhe është duke zhvilluar një takim me kryetarin e Partisë Demokratike, Sali Berisha.
Takimi vjen pak ditë para protestës së paralajmëruar të 6 dhjetorit, ndërkohë që në fokus të diskutimeve pritet të jenë dhe primaret, aksioni opozitar dhe zgjedhjet e 14 majit.
Ndërkohë, deri më tani kryetari i Pl nuk ka konfirmuar që do të jetë pjesë e protestës së 6 dhjetorit, e cila do të mbahet në ditën kur në Tiranë do të vijnë të jgithë liderët e Bashkimit Europian si dhe të Ballkanit Perëndimor.
Ish kryeministri Sali Berisha më herët tha se protesta e cila do të mbahet më 6 dhjetor do të jetë një jehonë për t’i treguar liderve të Europës dhe rajonit se përballë atij që e quan narko-shtetit të Edi Ramës, ka një popull opozitar i cili nuk do ta tolerojë.
Berisha shpjegoi se protesta nuk ka për qëllim të pengojë mbledhjen e samitit të be-ballkani përendimor, por e quajti mirëseardhje në të vërtetën e shqiptarëve.
Ndërsa, për socialistët një protestë e tillë në ditën kur pritet të organizohet dhe samiti i BE-së me vendet e Ballkanit Perëndimor në Tiranë, ku do të vijnë krerët e qeverive të Ballkanit Perëndimor por dhe zyrtarë të lartë të BE-së, është e papranueshme.
