Maroku mposhti sot 2-0 Belgjikën, ndërsa një episod totalisht i pazakontë ndodhi para startit të ndeshjes.
Portieri titullar i Marokut, Bono, është zëvendësuar vetëm pak sekonda para fillimit të sfidës në mënyrë të papritur.
Ai figuronte në rreshtimin titullar të Marokut, madje bëri nxemjen, këndoi edhe himnin me pjesën tjetër të ekipit dhe u rreshtua për foton.
Por çuditërisht, pak sekonda më vonë, pasi u hodh shorti për ndarjen e fushës, në terren ishte portieri i dytë i kësaj përfaqësuese, Munir.
Nuk dihet ende arsyeja e këtij zëvendësimi të papritur, por mediat raportojnë se ai ka ndjerë një shqetësim muskular dhe ka kërkuar zëvendësim.
FIFA nuk e ka regjistruar si zëvendësim gjatë sfidës, duke mos i shpërdoruar afrikano-veriorëve mundësinë për të bërë ndryshime gjatë ndeshjes.
