Në Varrezat e Dëshmorëve në Tiranë po kryhen homazhe për të përkujtuar 78-vjetorin e Çlirimit të Shqipërisë, pas Luftës së Dytë Botërore.
Në ceremoninë ku u kryen homazhe, mori pjesë presidneti i vendit Bajram Begaj, kryetarja e Kuvendit Lindita Nikolla si dhe kryebashkiaku i Tiranës, Erion Veliaj, të cilët vendosën kurora me lule në monumentin e ‘Nënës Shqipëri’.
Kryetarja e Kuvendit, Lindita Nikolla ka përshëndetur sot 29 Nëntorin, Ditën e Çlirimit të atdheut.
“Prej 78 vjetësh festojmë Ditën e Çlirimit, me krenarinë e ligjshme që ushqen rreshtimi me Kolacionin e Madh Antifashist dhe fakti se Shqipërinë e çliruan partizanët, luftëtarët dhe populli shqiptar. Nderojmë sot çlirimtarët e Shqipërisë, partizanët, luftëtarët, heronjtë dhe dëshmorët e Luftës Antifashiste Nacional-Çlirimtare, veteranët dhe pasardhësit e tyre! Vlerat e antifashizmit dhe të lirisë, të cilat triumfuan në Shqipëri më 29 Nëntor 1944, janë të pacënueshme, janë themeli i shoqërisë demokratike e perëndimore që po ndërtojmë. Shqipëria evropiane i ka rrënjët në Shqipërinë antifashiste.”, shkruan Nikolla.
