Për momentin, Joao Felix është i impenjuar në Kupën e Botës me Portugalinë teksa sulmuesi është një nga titullarët e trajnerit Fernando Santos. Skuadra po ecën mirë dhe është në çerekfinale teksa talenti luzitan deri më tani koleksionon një gol dhe dy asistë. Megjithatë, me të mbaruar Botërori, Felix do të duhet të zgjidhë edhe të ardhmen e tij teksa ka shprehur hapur dëshirën për t’u larguar nga Atletico Madrid.
Së fundmi, shefi i klubit spanjoll Miguel Angel Gil, theksoi se marrëdhënia e komplikuar me trajnerin Diego Simeone është një prej arsyeve që e shtyjnë 23-vjeçarin të largohet nga kryeqyteti spanjoll, madje nëse vjen oferta e duhur që në muajin janar mund të ketë lëvizje.
“Felix është investimi më i madh që ka bërë klubi dhe unë mendoj se ai është edhe një nga talentët më të mëdhenj në qarkullim. Por, duke marrë parasysh marrëdhënien me trajnerin, numrin e pakët të minutave dhe motivimin, mendoj se është e arsyeshme që të marrim parasysh ofertat që mund të shfaqen për të. Do të doja shumë që të qëndronte, por lojtari nuk e mendon kështu”, u shpreh Gil. Kujtojmë se Felix u transferua te Atletico Madrid në verën e vitit 2019 për shumën rekord të 114 milionë paundëve.
