Sigurisht që fitorja e Argjentinës ndaj Francës dhe ngritja e trofeut të Kupës së Botës nga Messi, pushton faqet e para të mediave sportive e më tej në ditën e sotme.
Ndjekim disa nga titujt kryesorë:
La Gazzetta dello Sport hapet me një homazh për Pleshtin: “Messi, këmba e Zotit”. Argjentina kampione e botës në finalen më të bukur ndonjëherë, ku 3 golat e Mbappe si golashënuesi më i mirë nuk mjaftojnë.
Corriere dello Sport hapet me titullin: “MaraDoha”. Messi si Diego. Franca mposhtet me penallti (4-2). Hat-triku i Mbappe nuk i mjafton Deschamps. Leo shënon dy herë dhe bën histori: “E bëra ëndrrën time realitet. Unë nuk do të ndalem”.
Tuttosport hapet me një dedikim: “Futboll, të dua!”. Duke ndjekur hapat e Maradonës, Messi e çon Argjentinën drejt titullit të tretë Botëror.
“Në qiell” është titulli i madrilenes AS. Argjentina fiton Kupën e tretë të Botës duke u kapur pas figurës së Messit, autor i dy golave dhe lojtari më i mirë i turneut. Finalja e madhe zgjidhet me penallti me një hero: Dibu Martínez.
Katalanasja Mundo Deportivo shkruan: “Messi më i miri në histori”. Argjentina është tre herë kampione pasi mposhti Francën në një finale të vendosur me penallti.
Ndërsa në Francë, L’Equipe është natyrshëm i hidhur, por i bën homazh protagonistit tjetër të një sfide që tashmë është kthyer në legjendë, pikërisht Mbappé: “Kokën lart”, me yllin francez i cili deri në fund, me një hat-trick, tentoi të përmbyste ndeshjen.
