Kryetarja e Kuvendit të Shqipërisë, Lindita Nikolla premtoi se shteti dhe politika shqiptarë do të kryejë një punë të madhe dhe voluminoze për përmbushjen e detyrave paraprake në kuadër të avancimit drejt BE.
Në cilësinë e organizatores së konferencës së djeshme “Roli i Kuvendit në Integrimin Europian të Shqipërisë”, Nikolla nënvizoi se vendi ynë ka prioritet kryesor dhe të vetëm anëtarësimin në BE.
Lidhur me angazhimin e institucionit që drejton, Nikolla shtoi se Parlamenti do të garantojë kontrollin demokratik të procesit të përmbushjes së detyrave të BE ndaj Shqipërisë, ku përfshihen lufta ndaj korrupsionit shtetëror, krimit të organizuar, etj. “Aspirata kombëtare për t’u bërë pjesë e Bashkimit Evropian dhe prioriteti strategjik i të gjitha qeverive shqiptare do të konkretizohet në këtë punë voluminoze që na pret të gjithëve në vitet në vijim. Ne duhet dhe do ta kalojmë këtë prag.
Në fund të fundit, ne nuk kemi plan ‘B’, integrimi evropian është plani i vetëm ‘A’ dhe prioriteti ynë kombëtar. Kuvendi si organi më i lartë përfaqësues ka një rol kyç në integrimin evropian të Shqipërisë pasi garanton integritetin demokratik, kontrollin ligjor dhe politik të këtij procesi. Ne gjithashtu jemi të vetëdijshëm se Kuvendi nuk është i rëndësishëm vetëm në aspektin teknik të procesit të anëtarësimit, por mbi të gjitha në demokratizimin dhe evropianizimin tërësor të Shqipërisë”, u shpreh kryeparlamentarja Lindita Nikolla.
