Seria A u kthye pas një ndërprerje prej më shumë se 50 ditësh. Salernitana-Milan ishte ndeshja që hapi javën e gjashtëmbëdhjetë, me kuqezinjtë që fituan 1-2. Ndeshja u zhbllokua shpejt, teksa Leao shënon që në minutën e 10-të.
Ishte Tonali ai që jep një pasim në qendër, sulmuesi portugez shkëputet bukur, kalon edhe portierin Ochoa dhe kalon Milanin në avantazh. Ende pa kaluar as 5 minuta, miqtë nga Milano shënojnë edhe golin e dytë.
Kësaj here është vetë Tonali, i cili nuk ka gabuar pas një asisti të marrë nga Diaz në zonën e rreptësisë. Kuqezinjtë i mbyllin 45 minutat e para në avantazh të dy golave.
Milan nuk e uli ritmin edhe në pjesën e dytë. Diaz shënon në minutën e 58-të, por goli anulohet për pozicion jashtë loje. Vendasit marrin zemër vetëm në fundin e ndeshjes dhe ngushtojnë në minutën e 83-të me Bonazzolin. Minutat e fundit ishin emocionuese, por Milan mbron fitoren, duke marrë tri pikë shumë të rëndësishme në luftën për titull.
