Rishi Sunak nuk e ka nisur mbarë drejtimin e Mbretërisë së Bashkuar. Kjo pasi sot është “ndëshkuar”. Kryeministri Rishi Sunak ka marrë një dënim për mosvendosjen e rripit të sigurimit në një makinë në lëvizje ndërsa filmonte video në rrjetet sociale.
Sunak kishte kërkuar më parë falje për incidentin, duke thënë se ishte një “gabim gjykimi”. Pasagjerët që kapen duke mos vendosur rripin e sigurimit kur është i disponueshëm, mund t’u jepet një gjobë në vend prej 100 £. Kjo gjobë mund të rritet në 500 £ nëse çështja shkon në gjykatë.
Kryeministri ishte në Lancashire kur u filmua video, gjatë një udhëtimi në veri të Anglisë. Videoja – për të promovuar raundin e fundit të qeverisë për “nivelimin e shpenzimeve” – u postua në llogarinë e Sunak në Instagram. Është hera e dytë që Sunak merr një penalitet gjatë kohës që ishte në qeveri.
Prillin e kaluar, ai u gjobit së bashku me Boris Johnson dhe gruan Carrie për thyerjen e rregullave të bllokimit të Covid – duke marrë pjesë në një mbledhje për ditëlindjen e kryeministrit të atëhershëm në Downing Street në qershor 2020. Njoftimet për “penalitete fikse” janë sanksion për shkelje të ligjit dhe nënkuptojnë gjobë, e cila duhet të paguhet brenda 28 ditëve, ose të kontestohet.
Nëse dikush zgjedh të kundërshtojë gjobën, Policia më pas do të shqyrtojë rastin dhe do të vendosë nëse do ta tërheqë gjobën ose do ta çojë çështjen në gjykatë./BBC
