Katër bomba të improvizuara janë gjetur nga policia në një varrezë në Irlandën e Veriut. Policia tha se ato ishin vendosur në të njëjtën zonë ku u dogjën rrobat e pjesëmarrësve në një paradë republikane të hënën e Pashkëve.
Mediat e huaja raportojnë se gjetja e këtyre bombave vjen disa orë përpara vizitës së presidentit amerikan Joe Biden në Belfast.
Ndihmës shefi i policisë Bobby Singleton tha se zbulimi i bombave ishte një zhvillim “i keq dhe shqetësues”. Ai shtoi se oficerët e kundër-terrorizmit tani do të udhëheqin një hetim, për të zbuluar më tepër rreth katër mjeteve shpërthyese.
Makina të blinduara dhe dhjetëra oficerë policie kanë zbritur në Belfast përpara vizitës së presidentit. Rrugët përreth hotelit Grand Central janë mbyllur si pjesë e operacionit të madh të sigurisë.
Joe Biden ka folur shpesh me krenari për rrënjët e tij irlandeze, dhe kryeministri irlandez Leo Varadkar ka thënë se vizita e tij këtë javë ka të bëjë me “mirëpritjen e një djali të Irlandës në shtëpi”.
Presidenti amerikan është në mesin e 32 milionë njerëzve në SHBA me trashëgimi irlandeze. Stër-stërgjyshi i tij Owen Finnegan, emigroi në SHBA nga gadishulli Cooley i Co Louth në Irlandën lindore.
