Të paktën 108 oficerë policie janë plagosur në Francë gjatë përleshjeve të dhunshme me protestuesit e zemëruar me reformat e pensioneve.
Ministri i Brendshëm, Gerald Darmanin, tha se një numër kaq i madh i të plagosurve nga radhët e policisë ishte jashtëzakonisht i rrallë, duke shtuar se 291 persona ishin arrestuar gjatë trazirave.
Mediat e huaja shkruajnë se qindra mijëra kanë marrë pjesë në demonstratat e 1 Majit kundër reformave të presidentit francez, Emmanuel Macron.
Shumica ishin paqësore, por grupet radikale hodhën bomba me benzinë dhe fishekzjarre. Policia u përgjigj me gaz lotsjellës dhe ujë. Nuk dihet se sa protestues janë lënduar.
Kryeministrja Elisabeth Borne shkroi në “Twitter” se dhuna ishte “e papranueshme” , ndërsa vlerësoi gjithashtu “mobilizimin dhe angazhimin e përgjegjshëm” të demonstruesve në shumë qytete.
Kjo është dita e fundit e aksionit masiv kundër ndryshimeve që rrisin moshën e pensionit shtetëror nga 62 në 64. Sindikatat kërkojnë tërheqjen e tyre.
Ministria e Brendshme tha se numri i përgjithshëm i demonstruesve ishte 782,000, duke përfshirë 112,000 në kryeqytetin Paris, por sindikata CGT thotë se shifra është trefishi i këtij numri.
Udhëheqësit e sindikatave ishin të bindur se kundërshtimi prej muajsh ndaj reformave nuk po zbehej.
“Faqja nuk do të kthehet për sa kohë që nuk ka tërheqje të kësaj reforme të pensioneve. Vendosmëria për të fituar është e paprekur,” tha kreu i CGT Sophie Binet, cituar nga AFP.
Dhuna shpërtheu edhe në Lyons, Toulouse dhe Nantes, ku automjeteve u dogjën dhe u sulmuan biznese.
