Amir Rrahmani është shndërruar në një nga lojtarët më të rëndësishëm të organikës së Napolit. Mbrojtësi i Kosovës ka zhvilluar një sezon të madh, që u kurorëzua me fitimin e titullit kampion në Serinë A.
Megjithatë, shqetësimi kryesor në lidhje me ish-futbollistin e Partizanit vijon të mbetet kontrata e tij, e cila përfundon në verën e vitit 2024.
Së fundmi, mediet italiane shprehen të sigurta se 28-vjeçari ka gjetur gjuhën e përbashkët me klubin napolitan sa i takon rinovimit dhe mbetet vetëm konfirmimi zyrtar.
Rrahmani ka pranuar të firmosë deri në vitin 2027, ndërsa ka opsion edhe për një tjetër vit.
Kështu, kampionët e rinj të Italisë kanë blinduar një nga “yjet” e repartit të mbrojtjes. 29-vjeçari me kontratën e re do të përfitojë 2 milionë euro neto në sezon, plus bonuset në bazë të performancës dhe objektivave sezonalë.
Falë kësaj marrëveshjeje, drejtuesit e Napolit janë tejet të lumtur pasi largojnë zërat për një largim të mundshëm të Rrahmanit në merkaton verore, teksa vlera e mbrojtësit në treg përllogaritet deri në 30 milionë euro.
Napolitanët për ta transferuar nga Verona shpenzuan vetëm 14 milionë euro, teksa ky është sezoni i tretë për mbrojtësin e Kosovës në Itali.
