Belind Këlliçi, ish-kandidati i koalicionit “Bashkë Fitojmë” për bashkinë e Tiranës, ka treguar sot “formulën” për fitoren e opozitës në zgjedhjet e 2025-ës.
Këlliçi tha se opozita duhet të gjejë gjuhën e përbashkët mes vetes.
Në një intervistë me Sonila Meçon, ai deklaroi se ekipi i Partisë Demokratike duhet të shohë nga vetja dhe të ulet të bëjë një analizë.
Vetëm duke tejkaluar ambiciet personale, sipas tij, PD mund të rikthejë shpresën te qytetarët.
“Ka një mijë gjëra që mund t’i kisha bërë më mirë, por padiskutim edhe ekipi i Partisë Demokratike duhet të shohë nga vetja. Ne të gjithë duhet të ulemi për të bërë një analizë të vërtetë me veten tonë.
Ore, a kemi ne qëllim që në 2025 të bëhemi deputetë e të rrimë në opozitë dhe të mbajmë monopolin e opozitës apo ne kemi qëllim që të mundim Edi Ramën e të fitojmë?!
Në kuadër të kësaj të dytës, ne duhet të bëjmë gjithçka, gjithçka, duhet tejkaluar çdo ambicje personale e ego për të bërë të mundur që ne, në 2025-ën… A ka mundësi, zgjedhje të parakohshme?! Duhet gjetur gjuha, duhet gjetur gjuha për t’u bashkuar. Nuk po them me “vulën”, por po them me çdo demokrat që nuk e gjen veten plotësisht te projekti ynë për momentin”, theksoi Këlliçi.
