Lautaro Martinez nënvizoi se Interi është në hapin e fundit, pra në finalen e Ligës së Kampionëve kundër Manchester City.
Sulmuesi 25-vjeçar, i cili ishte pjesë e skuadrës së Argjentinës që fitoi Kampionatin Botërorin 2022 në Katar, është kthyer në lojtar vendimtar për Zikaltërit dhe pritet të luajë një rol të madh edhe në finalen e Stambollit.
Lautaro ka shënuar 28 gola dhe ka dhënë 11 asistime në 56 ndeshje në të gjitha garat këtë sezon.
Megjithatë, në rrugën e tyre qëndron një skuadër si Manchester City, që kërkon tripletën.
“Ato janë dy finalet më të rëndësishme që një lojtar mund të luajë, e vetmja gjë që ndryshon është fanella. Ndjenjat janë të njëjta, unike, për të shkuar deri në fund”.
“Është falë punës së bërë gjatë vitit, skuadra është ajo që ka rëndësi, është gjëja më e rëndësishme. Jemi në hapin e fundit, duhet të jemi gati për këtë ndeshje”, ka thënë Lautaro.
Ai u ndal edhe te Manchester City, duke e vlerësuar lartë rivalin e finales.
“Ne e dimë se Manchester City është një rival shumë i vështirë për t’u përballur, për shkak të cilësisë që ka. Por ne jemi gati, kemi bërë punën tonë dhe jemi gati sa të mundemi”, nënvizoi argjentinasi.
