Kolegji Zgjedhor vendosi ditën e djeshme përsëritjen e zgjedhjeve në Bashkinë Rrogozhinë, duke pranuar ankimimin e koalicionit “Bashkë Fitojmë”. Kutia e Burgut të Rrogozhinës që i solli fitoren kandidatit të mazhorancës Edison Memolla, u konsiderua si e pavlefshme dhe tashmë për herë të parë do kemi përsëriten e zgjedhjeve në një bashki të vendit.
Kolegji Zgjedhor vendosi dje përsëritjen e zgjedhjeve në Bashkinë e Rrogozhinës, ku kandidatë ishin Edison Memolla i PS-së dhe Shkëlqim Hoxha i koalicionit “Bashkë Fitojmë”. Kolegji ka pranuar kërkesën e koalicionit “Bashkë Fitojmë”, për pavlefshmërinë e rezultatit për kutinë e burgut të Rrogozhinës, pasi ishte pikërisht ajo kuti që përmbysi rezultatin duke ia dhënë socialistit Edison Memolla. Duke qenë se diferenca e votave mes dy kandidatëve ishte më e vogël se ajo e pjesëmarrësve në votime në këtë qendër votimi, është vendosur përsëritja e gjithë procesit. Ky është vendim i formës së prerë dhe tashmë kreu i shtetit në zbatim të kushtetutës së vendit do të përcaktojë një datë për ripërsëritjen e zgjedhjeve. Është rasti i parë që nga krijimi i Kolegji Zgjedhor që vendoset përsëritja e zgjedhjeve në një zonë të caktuar. Po ashtu janë edhe tre bashki të tjera ku rezultati është i ngushtë dhe pritet të jepet vendimi i Kolegjit Zgjedhor. Nuk dihet nëse rasti i Rrogozhinës mund të shërbejë si precedent. Më parë, koalicioni “Bashkë Fitojmë” e kishte ankimuar çështjen në KQZ dhe KAS, por të dyja institucionet vendosën të rrëzojnë pretendimet e opozitës. I këtij mendimi nuk ka qenë institucioni fundor i cili ka edhe vendimin e formës së prerë që pasi ka shqyrtuar çështjen me imtësi vendosi që në Rrogozhinë të ketë përsëritje të zgjedhjeve. Në bashkinë Rrogozhinë, kandidati i Partisë Socialiste fitoi me një diferencë prej vetëm 23 votash nga kandidati i “BF”. Në Rrogozhinë ishin 56 qendra votimi ku nga numërimi i 55 prej tyre fitues ishte Hoxha, por ndryshimi i madh ndodhi në kutinë e fundit të numëruar, që i përkiste Burgut të Rrogozhinës. Sipas të dhënave zyrtare, rezulton se, 92 vota janë dhënë për Partinë Socialiste, 12 për koalicionin e opozitës “Bashkë Fitojmë” dhe 4 vota kanë qenë të pavlefshme. Edison Memolla nga Partia Socialiste ka marrë në total në përfundim të procesit 5120 vota, ndërsa Shkëlqim Hoxha nga koalicioni “Bashkë Fitojmë” 5097 vota. Diferenca e votave ka qenë shumë e vogël, ku Hoxha ka humbur Bashkinë për vetëm 23 vota më pak. Shkëlqim Hoxha, kandidati i koalicionit “Bashkë Fitojmë”, e kryesoi garën gjatë gjithë kohës, ndonëse me diferencë të vogël. Deri në kutinë e fundit, ku rezultati u përmbys në favor të Edison Memollës i Partisë Socialiste. Kutia e fundit që u numërua në Rrogozhinë ishte ajo e burgut. Nga këto 92 vota shkuan për kandidatin e Partisë Socialiste, Edison Memolla dhe vetëm 12 vota shkuan për kandidatin e koalicionit “Bashkë Fitojmë”. Kjo lloj “çoroditje” që nuk përkonte me rezultatin e kutive të tjera është përdorur nga opozita për të ndrituar dyshimin e asyeshsëm se votimi në Burgun e Rrogozhinës ishte I manipuluar dhe jo I drejtë. Votat massive drejt kandidatit socialist u cilësuan nga opozita si shantazh ose joshje e të burgosurve nga ana e administratës së burgut me qëllim që të votonin për kandidatin e mazhorancës. Edhe pse KQZ dhe KAS rrëzoi pretendimet e përfaqësuesve të koalicionit “Bashkë Fitojmë”, ka qenë kolegji ai që ditën e djeshme vendosi përsëritjen e zgjedhjeve me argumentimin se janë konstatuar parregullsi dhe verdikti I qytetarëve është tjetërsuar.
