Declan Rice është në qendër të vëmendjes së merkatos verore. Mesfushori anglez fitoi trofeun e Conference League me West Ham, skuadër ku mban edhe shiritin e kapitenit.
24-vjeçari po kërkohet me ngulm nga dy klubet më të mira angleze: Manchester City dhe Arsenali. Kampionët dhe nënkampionët e Anglisë, “rrëmbyen” skenën në ishull, pasi garuan mes tyre deri në fund për trofeun e Premier Leaugue.
Tani po konkurrojnë me njëri-tjetrin për shërbimet e mesfushorit “shkatërrues”. Me kërkesën e veçantë të trajnerit Mikel Arteta, “Topçinjtë” e kanë vendosur Rice si objektivin kryesor në merkaton verore.
Klubi anglez ofroi 80 milionë paund + 10 të tjera në formën e bonuseve për kartonin e Rice. Por, drejtuesit e West Ham e refuzuan propozimin e Arsenalit.
Mediet britanike bëjnë të ditur se të njëjtën gjë kanë bërë edhe me ofertën zyrtare të Man City-t. Kampionët e Europës ofruan 75 milion paund dhe 15 milionë të tjera në formën e bonuseve.
Gjithsesi, ofertat nuk kënaqin West Ham, me “Çekanët” që kërkojnë që të përfitojnë më shumë se 100 milion paund nga shitja e një prej lojtarëve më të mirë të organikës.
Ditët në vijim do të jenë vendimtare për të ardhmen e Rice, ku pritet të shihet me shumë interes se kush do ta fitoj duelin në merkato mes Man City-t dhe Arsenalit.
