Paniku mbizotëroi në një rrugë qendrore në Tel Aviv pasi një oficer policie, gjatë një demonstrate kundër reformës gjyqësore në Izrael, u qëllua nga një person i armatosur, i cili më pas u “neutralizua”.
Policia izraelite e përshkroi të shtënat si një sulm terrorist dhe sulmuesi u identifikua më vonë. Sipas mediave izraelite, bëhet fjalë për një palestinez 22-vjeçar i cili “i përket një organizate terroriste dhe është larguar nga një kamp refugjatësh në Bregun Perëndimor”.
Të shtënat vijnë një ditë pasi një adoleshent palestinez u vra në një sulm nga civilët izraelitë në një fshat palestinez në Bregun Perëndimor të pushtuar.
Vihet re se dy izraelitë u arrestuan pas vdekjes së adoleshentit palestinez i cili u qëllua kur kolonët sulmuan një fshat në Bregun Perëndimor.
Banorët e fshatit palestinez Burka thanë se kolonët hebrenj hynë në komunitet të premten mbrëma, hodhën gurë dhe u vunë flakën makinave. Ministria e Shëndetësisë e Autoritetit Palestinez njoftoi se një 19-vjeçar u vra.
Në deklaratën e ushtrisë izraelite thuhet se në bazë të elementeve të para të hetimit, përleshjet nisën kur izraelitët shkuan për të kullotur delet e tyre pranë fshatit dhe palestinezët tentuan t’i përzinin. Pasoi një konfrontim që u përshkallëzua në luftime me gurë “nga të dyja anët” dhe “të shtëna dhe gjuajtje me fishekzjarre nga palestinezët”.
“Gjatë konfliktit, civilët izraelitë qëlluan mbi palestinezët. Si pasojë e konfrontimit, një palestinez mbeti i vrarë, katër të tjerë u plagosën dhe një automjet palestinez u dogj”, thuhet në deklaratë.
Ndërkohë, pasditen e sotme, të paktën një izraelit u qëllua dhe u plagos rëndë në një rrugë qendrore në Tel Aviv. Policia izraelite tha se po hetonte incidentin si një sulm “të mundshëm”.
Shtetet e Bashkuara kanë shprehur shqetësimin për përshkallëzimin e sulmeve nga kolonët hebrenj në fshatrat palestineze në Bregun Perëndimor, ku dhuna është përshkallëzuar prej një viti, me bastisjet e ushtrisë dhe sulmet palestineze ndaj izraelitëve në rrugë.
