Ka njerëz dhe platforma që nuk e kanë fort qejf Elon Musk dhe ky i fundit, ndonëse përgjithësisht i merr me sportivitet kritikat, së fundmi vendosmi të ndërmarrë një veprim radikal.
Gjigandi i mediave sociale, Twitter, i cili zotërohet nga Musk, aplikoi një vonesë prej pesë sekondash që ngadalësonte aksesin në faqe – një proces i njohur si throttling – duke përfshirë New York Times, Reuters, Instagram dhe Blue Sky, një tjetër rrjet social, raportoi të martën Washington Post.
Faqet që hapen me vonesë përfshijnë konkurrentë të Twitter dhe mediat që kanë kritikuar Elon Musk. Washington Post testoi vonesat dhe zbuloi se nëse dikush klikon një link në Twitter, faqja hapet me vonesë dhe për pesë sekonda, ekrani është bosh.
Pas raportimit, duket se problemi u zgjidh. Musk ka zhvilluar një betejë të vazhdueshme kundër kritikëve të tij në media. Në prill, Twitter etiketoi BBC-në dhe NPR-në si “media të lidhura me shtetin”, gjë që shkaktoi protesta nga mediat dhe stafi i tyre./E.Ç
