Kryeministri Edi Rama deklaroi sot në Romë, në një konferencë të përbashkët shtypi me zëvendëskryeministrin dhe ministrin e Jashtëm italian, Antonio Tajani se, marrëveshja e pensioneve mes Shqipërisë dhe Italisë është drejt finalizimit.
Pas takimit të Komitetit të Përbashkët për Investimet, Çështjet Ekonomike dhe Sociale, Shqipëri-Itali, duke folur për shqiptarët që jetojnë dhe punojnë në Itali, Rama u shpreh se, “nuk dua të përsëris atë që ka thënë në mënyrë shumë të detajuar dhe me shumë kujdes zëvendëskryeministri Tajani ka thënë tashmë, por dua vetëm t’u them shqiptarëve se ka shqiptarë që janë në Itali prej vitesh dhe kontribuojnë prej vitesh në zhvillimin e ekonomisë italiane dhe kemi kuptuar shumë herë që marrëveshja për pensionet është në pikë arritje pothuajse dhe kemi fituar nga premtimi solem nga zëvendëskryeministri që kjo pikarritje nuk do të jetë një pikënisje tjetër, siç ndodh shpeshherë në anët tona”.
“Kështu, të gjithë shqiptarët e shumtë që jetojnë, kontribuojnë, kanë punuar dhe punojnë në Itali, më në fund do të mund të ngrenë dolli për lavdinë e Republikës italiane dhe ta falënderojnë këtë qeveri, sepse kjo qeveri më në fund do ta çojë deri në fund këtë nismë shumë të rëndësishme nga pikëpamja, jo vetëm financiare, por edhe nga pikëpamja sociale dhe nga pikëpamja e respektit dhe të dinjitetit të punës së njerëzve”, tha Rama.
Konferenca e përbashkët për shtyp me ministrin e Jashtëm, Antonio Tajani u mbajt pas takimit të dytë në nivel politik të Komitetit të Përbashkët Ekonomik (KPE) Itali-Shqipëri./ S.M
