Luftrat e vazhdueshme duket se e kanë kthyer Lindjen e Mesme në një “parajsë” për trafikantët e drogës, të cilët po gjejnë një treg me kërkesë të lartë për të shitur “mallin” e tyre.
Njësitë siriane te antidrogës kanë njoftuar se kanë sekuestruar një sasi rekord prej 2.3 tonësh captagon, një lende narkotike e familjes së amfetaminës, e ngjashme me kokainën por me cilësi më të ulët.
Sipas autoriteteve izraelite, luftëtarët e Hamasit e kanë përdorur këtë substancë për të rritur forcën e tyre dhe adrenalinën, kur kryenin sulmet në Rripin e Gazës.
Faqja izraelite e lajmeve, Channel 12, raportoi se pilula Captagon u sekuestruan nga të burgosurit e Hamasit dhe u gjetën me trupat e luftëtarëve të vdekur. Ata pretendojnë se disa nga terroristët e kishin marrë drogën për të ‘kryer vrasje çnjerëzore’ gjatë sulmit të 7 tetorit në Izrael.
E përshkruar ndryshe si “droga e Xhihadit”, captagoni është popullor në Lindjen e Mesme dhe i përhapur sidomos në zonat e shkatërruara nga lufta siç është Siria, ku konflikti ka nxitur kërkesën dhe ka krijuar mundësi të mëdha për prodhuesit.
Ne fillim, prodhimi i kësaj droge ishte fokusuar në Liban, ku Shteti Islamik e shiste masivisht për të financuar aktivitetet e tij. Captagoni u pagëzua si “droga e Xhihadit” pasi u gjet në bazat e militantëve, përfshirë dhe atë të përdorur nga islamistët që vranë 90 vetë në teatrin Bataclan të Parisit, në vitin 2015.
Korrikun e dy viteve më parë, autoritetet italiane njoftuan se kishin kapur 14 tonë pilula amfetaminash që mbërrinin një vlerë tregu prej 1 miliardë dollarë e që vinin nga Siria. Ky u përshkrua atëherë si operacioni më i madh i këtij lloji në botë./ S.M
