Rikthimi i tingujve (dhe i performancave në skenë) i disa prej këngëve hit të saj, ndër vite është një ngacmim shumë interesant, personal, që Elsa Lila ka zgjedhur t’i bëj kujtesës së ndjekësve të saj përmes instagramit.
“Pyes lotin”, kënga epope, është postimi i fundit ku ajo ka lënë të shkruar në gërma të vogla sinqeritetin e saj të madh “Isha vetëm 15 vjeç dhe nuk e imagjinoja se mbas 27 vitesh do të ishim ende së bashku.
Ju pres ta rikëndojmë në 1 nëntor në Tiranë në Pallatin e Kongreseve”.
Është pikërisht ky mesazh e kjo mënyrë komunikimi, përmes arkivës jo vetëm vizuale por dhe arkivës së zemrës dhe mendjes së Elsës, që po na zbulon pak nga pak pjesëza të repertorit, në “Finalmente Elsa” që do të zhvillohet pas pak ditësh në Tiranë.
Si postim i parë ishte emocioni i përfaqësimit të saj historik në Sanremon e 2003-it, me “Valeria”-n, moment të cilin ajo e rikujton edhe sot e pas 20 vitesh me shumë emocion. Pastaj ishte “Diferenca je ti”, dueti i suksesshëm me Pirro Çakon, kënduar si këngë përshëndetëse në Festivalin e Këngës në RTSH në 2007-ën, ku të dy bashkë ishin dhe prezantues.
Në këtë rikujtesë Elsa ka luajtur me motivin që e dijnë, e këndojnë të gjithë- “Dashuritë e mëdha duke qeshur fillojnë si dhe vetë komeditë”…
Një motiv ky që do të këndohet padiskutim, si në kor, nga të gjithë ata që do të jenë në mbrëmjen e 1 nëntorit në Pallatin e Kongreseve, në “Finalmente Elsa”, ku do të këndohen edhe plot këngë të tjera, të cilat Elsa do t’na i zbulojë mesa duket në postimet e saj të radhës.
Kështuqë le të presim me kuriozitet, se cila do të jetë kujtesa e herës tjetër!/ S.M
