Një qen në SHBA është kurorëzuar si më i shëmtuari në botë.
Pekinezi 8-vjeçar Wild Thang fitoi çmimin e parë në konkursin “Qeni më i Shëmtuar në Botë” që organizohet në Kaliforni. Ai ka marrë pjesë 5 herë, është renditur i dyti 3 herë dhe më në fund ka arritur të triumfojë.
Wild Thang u sëmur nga murtaja e qenve kur ishte këlysh, shkruhet në biografinë e tij.
“Ai mbijetoi, por me dëmtime të përhershme. Dhëmbët nuk i dolën, gjuha i rri jashtë dhe këmba e djathtë e përparme lëkundet gjithë kohën”.
Përtej problemeve fizike, ai është një qenush “i lumtur dhe i shëndetshëm”.
Wild Thang dhe pronarja e tij, Ann Lewis morën një çek prej 5000 dollarësh.
Konkursi i Qenit më të shëmtuar në botë organizohet prej thuajse 50 vjetësh dhe “feston për defektet që i bëjnë të gjithë qentë të veçantë dhe unikë”, shkruhet në faqen zyrtare duke theksuar se nuk ka si qëllim që “të tallet me qentë e shëmtuar”./E.Ç
