Enkelejd Alibeaj, një nga nismëtarët e partisë së re “Djathtas 1912”, theksoi se partia e tij përfaqëson një fluks të ri politik për të adresuar mungesën e përfaqësimit të një grupi të konsiderueshëm shqiptarësh. Në një intervistë televizive, ai mohoi akuzat se “Djathtas 1912” është një patericë e Edi Ramës, duke argumentuar se partia e tij ka si objektiv të përfaqësojë ata që ndihen të lënë pas nga partitë e tjera, përfshirë PD dhe PS.
Alibeaj theksoi se qëllimi i “Djathtas 1912” është të sigurojë një përfaqësim të denjë për atë 30% të zgjedhësve shqiptarë që aktualisht ndihen të pa përfaqësuar. Ai paralajmëroi se nëse këta qytetarë nuk gjejnë përfaqësim, rrezikojnë të ikin nga Shqipëria, duke e forcuar pozitat e Edi Ramës.
Përveç kësaj, ai shprehu pakënaqësinë me liderët aktualë të PD-së, duke pohuar se ishte larguar nga partia për të mos e lënë atë në duar të Sali Berishës. Alibeaj beson se është e domosdoshme që partitë e reja të kenë një zë në politikën shqiptare për të parandaluar copëtimin e votave dhe për të garantuar që çdo grup të ketë përfaqësimin e tij. Ai përfundoi duke thënë se nëse partia e tij dështoi, nuk do të mbetej më në skenën politike, duke lënë vend për forcimin e alternativave të tjera./ S.M
