Banka e Shqipërisë ka miratuar një sërë rregulloresh që prekin në mënyrë të drejtpërdrejtë kreditë konsumatore.
Për të gjitha subjektet financiare jobanka do të ketë kritere më të forta të cilat synojnë mbrojtjen e konsumatorit dhe uljen e normave të interesit. Nëpërmjet ndryshimit të rregullores “Për Kredinë konsumatore dhe Hipotekore” Banka e Shqipërisë do të rishikojë metodologjinë e interesit maksimal që mund të vendosen nga subjektet jo banka apo shoqëritë e mikrokredisë, duke ulur edhe më tej koston e interesit për kreditë konsumatorë në fashën nga 0 – 200 000 lek.
Një tjetër ndryshim i rëndësishëm përfshin reduktimin e kostove të komisioneve të aplikuara për kredinë. Përveç uljes së kostove konsumatori do duhet t’i paguajë komisionet menjëherë në momentin e marrjes së kredisë dhe jo të shpërndara në kohë.
Ndryshime pësoi edhe rregullorja për transparencën mbi produktet dhe shërbimet financiare, ndërsa Banka e Shqipërisë do të përcaktojë kriteret që duhet të kenë reklamat e institucioneve financiare. Institucioni rregullator do të përcaktojë elementët që do të përmbajë reklama si dhe përcaktimin e hapësirave kur Banka mund të ndërhyjë për të ndaluar apo korrigjuar element që mund të dezinformojë konsumatorët.
Këto ndryshime përmbyllin një sërë masash të marra nga Banka e Shqipërisë që nga fillimi i hetimeve nga prokuroria e Tiranës për skandalin e mikrokredive, ku mijëra qytetarë u zhvatën nëpërmjet një skeme të paligjshme që i vendoste ata në një spirale borxhi. Nga viti i kaluar marrja e një mikrokredie është bërë më e vështirë. Tashmë subjektet e mikrokredive duhet të aplikojnë kritere më të forta ku duhet të merret në vlerësim, mosha, aftësia paguese si dhe verifikimi i kredive konsumatore në institucione të tjera. Portofoli i kredisë së mikrofinancës arriti në 60.2 miliardë lekë në tremujorin e tretë të 2024-ës, në rritje me gati 12%, duke përbërë një shtyllë të rëndësishme të sistemit financiar./ S,M
