Shtetet e Bashkuara raportuan shpërthimin e parë të gripit të shpendëve vdekjeprurës H7N9 që nga viti 2017, në një fermë shpendësh, teksa vendi vazhdon të përballet me një lloj tjetër gripi të shpendëve që ka infektuar njerëzit dhe ka çuar në rritjen e çmimeve të vezëve në nivele rekord. Shpërthimi i gripit të shpendëve ka shkaktuar dëm të madh tek tufat e kafshëve në të gjithë botën, duke ndërprerë furnizimet dhe nxitur rritjen e çmimeve të ushqimeve.
Përhapja e gripit tek gjitarët, përfshirë lopët qumështore në SHBA, ka shkaktuar shqetësime të mëdha midis autoriteteve qeveritare, pasi mund të rrezikojë një pandeminë të re, raporton Reuters.
Lloji më shkatërrues i gripit të shpendëve në vitet e fundit ka qenë H5N1, i cili ka shkaktuar vdekjen e një personi në SHBA. Megjithatë, H7N9 ka rezultuar të ketë një shkallë shumë më të lartë vdekshmërie, duke vrarë afërsisht 40% të atyre që janë infektuar që nga identifikimi i tij për herë të parë në vitin 2013, sipas Organizatës Botërore të Shëndetësisë.
Shpërthimi i fundit i H7N9 është regjistruar në një fermë me 47,654 shpendë komercialë në Noxeby, Mississippi, sipas një raporti të Organizatës Botërore për Shëndetin e Kafshëve, i cili u publikua sot dhe citon autoritetet amerikane. “Gripi i shpendëve (HPAI) shumë patogjenik H7N9 i linjës së shpendëve të egër të Amerikës së Veriut është zbuluar në një fermë shpendësh komerciale”, thuhet në raport, duke shtuar se po merren masa të nevojshme në bashkëpunim me autoritetet lokale./ S,M
