Nga Artur Ajazi
Komunikimi në distancë, me video-satirike mes Lulit e kryeministrit Rama, ishte provokuese për Berishën.
Kjo pranverë, sërish do të jetë e zymtë për opozitaristët. Ata nuk arritën të ngrihen në lartësinë e të qenit “alternativë konkurruese” me Edi Ramën. Kur nuk arrin diku, ose je i paaftë, ose tinëzar. Tek Partia Demokratike, ekzistojnë të dyja. Brenda tyre ka paaftësi të lindur, dhe tinzarëllëk të kultivuar. Ajo nuk mund të jetë më pas 11 Majit, forca e dytë politike. Nga kalkulimet rezulton se PS merr 90 deri 95 mandate, PD merr 25 deri 27 mandate, dhe pjesa tjetër ndahet mes partive të vogla, që kanë mbrapa “ustain e madh” Berisha. Por e rëndësishme, është se PD kësaj here, del me rezultatin më të dobët, sikur në krye të saj të ishte vetë Lul Basha.
Meqenëse ra fjala tek Lul Basha, mendoj se Berisha nuk ka aftësi të krijojë qasje të tilla si ajo e Edi Ramës me ish-kryetarin e PD. Ajo ishte çoroditje e madhe për Berishën. Komunikimi në distancë, me video-satirike mes Lulit e kryeministrit Rama, ishte provokuese për Berishën. Tanimë vëmendja e shqiptarëve, nuk po shkon më drejt Berishës, por drejt Bashës, duke e parë atë si favorit kryesore që pas 11 Majit të renditet, si forcë e dytë pas Partisë Socialiste.
Përpjekja e Berishës, që nis me “firmosje kontratash me mbështetësit e tij për legalizimet”, apo dhe të tjera premtime boshe, nuk e shmangin atë nga disfata elektorale e kësaj pranvere të zymtë opozitarësh.
Berisha qysh tani po kërkon të ngrejë gjithfarë alibish dhe po thur skenarë të rinj për “mosnjohjen e rezultatit”. Por ajo që pritet të ndikojë tek rezultati i dobët në 11 Maj tek “kampi opozitar”, mbetet tek qejfmbetjet që kanë nisur brenda vetë Partisë Demokratike. Sali Berisha nuk mund të ndalë më furinë e zemërimeve që vijnë nga hartimi i pabarabartë i listave për kandidatët. Madje qejfmbetjet e tyre do të jenë shkaku kryesor i humbjes katastrofike të PD në 11 Maj. Mungesa e seriozitetit në hartimin e programit të PD, si dhe “toleranca” e Berishës ndaj emrave të përfolur nga partia e tij dhe aleatët, ka nisur të ketë ndasi mes vetë demokratëve nga qendra në bazë.
Në shumicën e degëve të PD-së në rrethe pakënaqësia ka arritur deri atje sa shumë nga militantët të shprehen kundër emrave të caktuara nga Berisha. Ata shprehen se “ne nuk votojmë emra të përfolur, boll duruam një kryetar që nuk dëgjon bazën dhe del i pabesë me ata që fituan kreun e listave në primare”. Por Berisha deri sot, i ka injoruar zërat e fuqishëm që i kanë dalë kundra tij në bazë.
Mbështetësit dhe militantët e PD, nuk e shohin gjëkundi veten tek program që mundohet të shpalosë Berisha darkave në ekranet e ndonjë televizioni “me rreze të shkurtër veprimi”. Gjithsesi ajo që mbetet e sigurt sot dhe deri në 11 Maj, është fakti se, PS fiton bindshëm zgjedhjet, dhe se PD do ta shohë veten e katërta ose e pesta në renditjen përfundimtare të partive politike përsa i përket rezultatit përfundimtar. Kjo disfatë sigurisht do të vendosë dhe fatin politik të ish-liderit historik./ SM
