Ministrja e Arsimit dhe Sportit, Ogerta Manastirliu, njëherazi kandidate e Partisë Socialiste në zgjedhjet parlamentare të 11 majit në qarkun e Tiranës, e cilësoi takimin e sotëm, me të rinj dhe reja që u zhvillua në Tiranë, si një eksperiencë shumë e mirë, për shkëmbimin e ideve dhe projekteve novatore në fushën e startupe-ve.
“Këto janë shembuj konkret të asaj që ne po bëjmë në shërbim të të rinjve, studentëve dhe ju jeni dëshmia e politikave dhe programeve duke qenë të parët në përthithen e mbështetjes në fushën e inovacionit, teknologjisë apo investimeve në sistemin arsimor dhe politikave të punësimit për të rinjtë”, tha ajo në takimin “Vizioni i të rinjve Shqipëria 2030”.
Duke u ndalur tek disa nga politikat mbështetëse, Manastirliu theksoi se, “kryesisht ato kanë ndikuar në përmirësimin e sistemit tonë arsimor dhe në ofrimin e mundësive të barabarta për të rinjtë dhe studentët dhe duke i përgatitur ata për të ardhmen dhe sfidat me të cilat përballen sot të rinjtë në një ekonomi që zhvillohet”.
Ajo tha se janë 450 shkolla ku është investuar në përmirësimin e infrastrukturës me laboratorë dhe standarde bashkëkohore, ndërsa numri i laboratorëve ka arritur në 340 dhe brenda vitit 2026 1 mijë shkolla do të kenë laboratorët inteligjentë për të mbështetur zhvillimin e teknologjisë.
“Sot 35 mijë nxënës të klasave të para të dyta dhe të treta janë pjesë e programit digjital apo kodimit, ndërsa 25 laboratorë të IA janë funksional dhe kanë bërë të mundur që të rinjtë të futen në rrugën e programimit. Ndërkohë mbështesim çdo vit 50 mijë studentë me bursa, tarifa të reduktura dhe procesin e ndërkombëtarizimit të universiteteve që po ecin me ritme të shpejta”, tha Manastirliu.
