Mijëra njerëz morën pjesë në disa protesta në mbarë Shtetet e Bashkuara kundër politikave të presidentit Donald Trump. Demonstratat, të organizuara nën moton “50501” (50 protesta, 50 shtete, 1 lëvizje), u zhvilluan në ditën që shënon 250-vjetorin e fillimit të Luftës Revolucionare Amerikane.
Protestat, të cilat u mbajtën nga Shtëpia e Bardhë deri në qendrat e qyteteve të mëdha, shprehën shqetësime për disa veprime të administratës Trump. Një çështje kyçe ishte deportimi i Kilmar Ábrego García, një burrë i dërguar gabimisht në El Salvador, dhe shumë protestues kërkuan kthimin e tij.
Pjesëmarrësit në këto tubime gjithashtu kritikuan planet e Trump për të ulur shpenzimet dhe përpjekjet e Departamentit të Efikasitetit të Qeverisë për të reduktuar punësimet në qeveri.
Megjithatë, atmosfera e përgjithshme ishte paqësore, edhe pse pati tensione në disa demonstrata, përfshirë një incident te Shtëpia e Bardhë, ku një protestues u përball me një person që mbante një pankartë mbështetëse për Trumpin.
Sipas të dhënave të fundit nga Gallup, 45% e amerikanëve mbështesin performancën e Trump në tremujorin e parë të mandatit të tij, një përqindje më e ulët se mesatarja historike e presidentëve në këtë periudhë./e.t
