Nga takimi i fushatës në Kukës, Agron Shehaj akuzoi kryeministrin Edi Rama për hipokrizi të thellë në lidhje me drejtësinë dhe mbështetjen e SPAK-ut, duke e konsideruar një tallje me qytetarët mënyrën si ai trajton procesin e reformës në drejtësi.
Shehaj sulmoi Ramën që merr meritën për ngritjen e drejtësisë së re, ndërkohë që në listat e Partisë Socialiste ka kandidatë të hetuar nga SPAK.
“Edi Rama thotë ‘Drejtësinë e bëra unë’. Po si e mbështet drejtësinë ai, kur në lista ka kandidatë të hetuar nga SPAK, nga vetë Dumani?”, u shpreh Shehaj.
Ai theksoi se kjo është një nga kundërshtitë më të mëdha morale dhe politike në vend, sepse të njëjtët njerëz që drejtësia i heton për korrupsion, promovohen sërish si përfaqësues të qeverisë.
“Nëse ka dikush që e di se kë po heton SPAK, është pikërisht Dumani. Dhe Rama i njeh këto hetime, por prapëseprapë i fut në lista për deputetë. Kjo është tallje me shqiptarët,” deklaroi ai.
Shehaj e mbylli mesazhin duke thënë se nuk mund të ketë drejtësi të vërtetë nëse njerëzit që po hetohen për korrupsion promovohen politikisht nga i njëjti kryeministër që pretendon se e ka krijuar këtë drejtësi.
Agron Shehaj ka bashkëthemeluar Partinë Mundësia dhe në zgjedhjet parlamentare të 11 Majit garon me numrin 10 në fletën e votimit.
Në fushatën e tij elektorale, Shehaj është fokusuar në takimet me qytetarët dhe bizneset, të cilave u ka premtuar se angazhimi i Partisë Mundësia është t’u heqë shqiptarëve shtetin nga kurrizi, përmes shkurtimit të taksave si dhe tkurrjes së administratës, që do të sjellë dhe kursim të 1 miliard eurove, me qëllim kthimin e këtyre parave në xhepat e qytetarëve./E.S
