Koreja e Veriut ka kryer testin e parë të sistemit të armatimit të anijes së saj më të re dhe më të avancuar luftarake, “Choe Hyon”. Lajmi u bë i ditur nga agjencia shtetërore KCNA, e cila raportoi se testimi u ndoq nga afër edhe nga udhëheqësi i vendit, Kim Jong-un, së bashku me zyrtarë të lartë ushtarakë.
Gjatë provës, nga anija u lëshuan raketa lundrimi, raketa kundërajrore dhe u qëlluan predha artilerie. Kim deklaroi se është koha që Marina e Koresë së Veriut të përshpejtojë armatimin bërthamor, në emër të mbrojtjes së sovranitetit detar dhe sigurisë kombëtare.
Sipas mediave shtetërore dhe analizave të imazheve satelitore nga institute kërkimore në SHBA dhe Korenë e Jugut, “Choe Hyon” është një anije me peshë rreth 5,000 tonë dhe gjatësi 140 metra.
Ajo mendohet të jetë e pajisur me sisteme për lëshimin e raketave dhe, sipas raportimeve nga faqja amerikane NK Neës, mund të mbajë edhe raketa bërthamore taktike me rreze të shkurtër veprimi.
Anija pritet të hyjë në shërbim në fillim të vitit të ardhshëm dhe do të luajë, sipas KCNA, një rol kyç në mbrojtjen kombëtare si pjesë e strategjisë së “parandalimit bërthamor”. /e.t
